វីរៈ ដារ៉ា ទទួលបានភាពស្អាតស្អំ ក្រោយរងមន្ទិលកំណត់លទ្ធផលទុកមុន(Match Fixing)

អ្នកចាំទីក្រុមជម្រើសជាតិកម្ពុជា វីរៈ ដារ៉ា បានទទួលនូវភាពស្អាតស្អំរបស់ខ្លួនវិញហើយ ក្រោយ​រង​មន្ទិល​សង្ស័យលើការប្រព្រឹត្តនូវទង្វើរៀបចំកំណត់លទ្ធផលទុកជាមុន (Match Fixing) បន្ទាប់ពីសហព័ន្ធ​កីឡា​បាល់ទាត់​កម្ពុជា សហការជាមួយអង្គភាពជំនាញអន្ដរជាតិ ស៊ើបអង្គេតយ៉ាងយកចិត្តទុកដាក់ បញ្ជាក់​ថា ដារ៉ា មិនបានប្រព្រឹត្ដទង្វើដូចការសង្ស័យឡើយ តែជាកំហុសបច្ចេកទេសប៉ុណ្ណោះ។

វីរៈ ដារ៉ា ទទួលបានភាពស្អាតស្អំ ក្រោយរងមន្ទិលកំណត់លទ្ធផលទុកមុន

នេះបើយោងតាមសេចក្ដីប្រកាសព័ត៌មានរបស់សហព័ន្ធ នៅល្ងាចថ្ងៃទី០៥ ខែមីនា ឆ្នាំ២០២៥ អំពីករណីការសង្ស័យលើការប្រព្រឹត្តនូវទង្វើរៀបចំកំណត់លទ្ធផលទុកជាមុន របស់កីឡាករ វីរៈ ដារ៉ា ក្នុងការប្រកួតផ្លូវការរវាងក្រុមជម្រើសជាតិកម្ពុជា ជាមួយក្រុមជម្រើសជាតិសិង្ហបុរី កាល​ពី​ថ្ងៃទី១១ ខែធ្នូ ឆ្នាំ២០២៤ ក្នុងព្រឹត្តិការណ៍ ASEAN Championship Mitsubishi Electric Cup នៅកីឡដ្ឋានជាតិសិង្ហបុរី។

ប្រភពដដែលបានបញ្ជាក់ថា ក្រោយពីអាជ្ញាធរមានសមត្ថកិច្ចបានធ្វើការតាមដាន និងស៊ើប​អង្កេត​តាម​សមត្ថកិច្ច​ជំនាញរួចរាល់ និងរួមផ្សំដោយការស្រាវជ្រាវ​របស់​គណៈកម្មការ​សុច​រិតភាព​របស់​សហព័ន្ធកីឡាបាល់ទាត់កម្ពុជា ទៅតាមនីតិវិធីជាក់លាក់ និងដោយការយកចិត្តទុកដាក់ ជាមួយ​នឹង​អង្គភាពជំនាញក្រៅប្រទេសមួយចំនួនកន្លងមក បានបង្ហាញលទ្ធផល ជាអវិជ្ជមានរួមគ្នាថា កីឡាករ​ជម្រើសជាតិ វីរៈ ដារ៉ា ពុំមានអ្វីពាក់ព័ន្ធទៅនឹងការសង្ស័យទាំងអស់នោះទេ។ ផ្ទុយទៅវិញ កំហុសដែលកើតឡើង នាពេលនោះ គឺជាកំហុសបច្ចេកទេសនៃការលេង ដោយអចេតនា​ប៉ុណ្ណោះ។

គួរដឹងថា ករណីសង្ស័យលើអ្នកចាំទី វីរៈ ដារ៉ា បានកើតឡើង កំឡុងការប្រកួតពានរង្វាន់ប្រចាំតំបន់ពូលA ស្របពេលកម្ពុជា បានចាញ់សិង្ហបុរី ២-១ ដោយ ២គ្រាប់របស់ក្រុមម្ចាស់ផ្ទះ រកបានដោយងាយ នៅដើមវគ្គទី១ បន្ទាប់ពីការបញ្ជូនបាល់មិនបានល្អរបស់ ដារ៉ា ។ ការណ៍នេះ ទើបបង្កឲ្យអ្នកគាំទ្រមានការសង្ស័យ រហូតរហូតសហព័ន្ធបើកការស៊ើបអង្គេត លើករណីសង្ស័យប្រព្រឹទ្ធទង្វើរៀបចំលទ្ធផលទុកជាមុន និងបានប្រកាសពីលទ្ធផលស៊ើបអង្កេតជាផ្លូវការថា អ្នកចាំទីវ័យក្មេង ដែលកំពុងឡើងដៃខ្លាំងរូបនេះ មិនបានប្រព្រឹត្តឡើយ៕