Man City ឈ្នះ Tottenham យប់មិញតែ Arsenal កំពុងឈឺចាប់ខ្លាំង

ក្រុមសំពៅលើទឹក Manchester City បាន​ទទួល​ជ័យជម្នះ​២ទល់​០​លើក្រុម Tottenham ក្នុង​ការ​ប្រកួតពាន​រង្វាន់ Premier League សប្ដាហ៍ទី៣៧ កាលពីយប់មិញ។

ខ្សែប្រយុទ្ធជម្រើសជាតិន័រវេស Erling Haaland បានស៊ុតបាល់បញ្ចូលទីយ៉ាងល្អ ក្រោយ​ទទួល​បាន​បាល់​ពីខ្សែបម្រើ Kevin De Bruyne នៅដើមតង់ទីពីរឱ្យ Man City នៅកីឡដ្ឋាន Tottenham Hotspur និងបានស៊ុតបាល់ប៉េណាល់ទីចុងម៉ោងដើម្បីបិទការ​ប្រកួតយកបីពិន្ទុ។

ជ័យជម្នះនេះធ្វើឱ្យក្រុមរបស់លោក Pep Guardiola នាំមុខក្រុម Arsenal ពីរពិន្ទុនៅលើកំពូលតារាង ហើយមានន័យថា ជ័យជម្នះនៅ Etihad ទល់នឹង West Ham នៅថ្ងៃអាទិត្យនឹងធ្វើឱ្យពួកគេក្លាយជាជើងឯកសម្រាប់រដូវកាលទី 4 ជាប់ៗគ្នា ដោយមិនគិតពីលទ្ធផលរបស់ក្រុមកាំភ្លើងធំជាមួយនឹងក្រុម Everton ។ គ្មាន​ក្រុម​ណា​មួយ​ក្នុង​ប្រវត្តិសាស្ត្រ​ក្របខ័ណ្ឌ​កំពូល​របស់​អង់គ្លេស​ដែល​ធ្លាប់​ឈ្នះ​ពាន PL ​បួន​ជាប់ៗ​គ្នានោះទេ។

ការបរាជ័យសម្រាប់ក្រុម Spurs ក៏មានន័យថា Aston Villa នឹង​ទទួល​បានក្របខ័ណ្ឌ Champions League មួយក្នុងចំណោម៤​ក្រុមចូលរួមដូចជា City, Arsenal និង Liverpool ក្នុងការប្រកួតក្របខណ្ឌកំពូលរបស់អឺរ៉ុបនៅរដូវកាលក្រោយ។

ការ​ប្រកួតដែលធ្វើ​ឡើង​នៅភាគខាងជើងទីក្រុងឡុងដ៍ត្រូវបានគ្របដណ្ដប់ដោយការជជែកដេញដោលគ្នាយ៉ាងស្វិតស្វាញ អំពីថាតើអ្នកគាំទ្រម្ចាស់ផ្ទះ Tottenham ចង់ឱ្យក្រុមរបស់ខ្លួន​ប្រកួតចាញ់ City ជាជាងឱ្យ​ក្រុម Arsenal លើក​ពាន​ក្នុង​នាមជាគូប្រជែងកៀកបំផុត​ក្នុងទីក្រុង។

អ្នកគាំទ្រក្រុម Spurs បានបង្ហាញអារម្មណ៍របស់ពួកគេចំពោះគូប្រជែង Arsenal ក្នុងនាទីបើកឆាក ដោយមានការស្រែកថា "ក្រោកឈរ ប្រសិនបើអ្នកស្អប់ Arsenal" បន្លឺឡើងជុំវិញកីឡដ្ឋាន។